Presidentja e Kosovës, Vjosa Osmani, ka përkujtuar masakrën e Lybeniqit, ku forcat serbe, 25 vjet më parë, vranë 79 civilë të këtij fshati.
Osmani, ka thënë se tendenca e regjimit gjenocidal të Serbisë për shfarosje të popullit shqiptar nuk kurseu as fëmijët.
Presidentja Osmani ka thënë se është obligim i yni institucional që asnjëherë të mos i ndalim përpjekjet tona për vendosjen e drejtësisë për viktimat, duke i dhënë kuptim lirisë sonë dhe duke e mbrojtur të vërtetën.
“25- vjet më parë, regjimi gjenocidal i Serbisë, sikurse në shumë anë të Kosovës, dëshmoi barbarinë e tij, duke vrarë 79 civilë të fshatit Lybeniq. Tendenca për shfarosje të popullit shqiptar nuk kurseu as Muhametin 18 muajsh dhe Leonardin, 7 vjeçar. Është obligim i yni institucional që asnjëherë të mos i ndalim përpjekjet tona për vendosjen e drejtësisë për viktimat, duke i dhënë kuptim lirisë sonë dhe duke e mbrojtur të vërtetën. Qoftë i perhershëm kujtimi për të gjithë të rënët për liri!”, thuhet në njoftimin e Presidencës.
25 vjet nga masakra në Gjakovë dhe Lybeniq të Pejës
Në prill të vitit 1999, masakra në Gjakovë dhe Lybeniq të Pejës shënoi një tragjedi të tmerrshme ku forcat serbe masakruan mbi 60 shqiptarë në lagjen e parë të Gjakovës dhe vranë shumë të tjerë në fshatin Lybeniq të Pejës, duke shkaktuar një vuajtje të pashtershme për familjet e prekura dhe për të gjithë kombin shqiptar.