Kryeministri, Albin Kurti, ka përkujtuar masakrën e Lybeniqit të Pejës, ku forcat e regjimit serb, 25 vjet më parë, vranë 79 civilë të këtij fshati. Ai ka bërë homazhe pranë lapidarit të 79 banorëve të vrarë të këtij fshati.
Nga atje, Kurti ka thënë se ushtarët serbë ndanë gratë, fëmijët dhe të moshuarit, që i urdhëruan të niseshin për në Shqipëri, kurse burrat i mbajtën aty.
“Sipas skenarit të krimit, ushtarët serbë ndanë gratë fëmijët dhe të moshuarit, që i urdhëruan të niseshin për në Shqipëri, kurse burrat i mbajtën aty. Xhamia e Lybeniqit atë ditë u kthye në një vend krimi, ku ushtarët serbë shtinë me armë automatiku në mënyrë të përsëritur që askush të mos mbetej i gjallë”, ka thënë Kurti, shkruan RTK.
Kurti ka kërkuar nga sistemi i drejtësisë një adresim me urgjencë të rasteve të kryera gjatë luftës, për çka, siç tha ai, dëshmitarët janë gjithnjë e më të moshuar.
“Shpresoj të deponohen sa më shumë dëshmi për krimet e kryera këtu në Kosovë. Ndërkaq, sistemit të drejtësisë nga këtu i bëj thirrje edhe një herë për adresim me urgjencë të rasteve të kryera gjatë luftës, sepse këto krime asnjëherë nuk janë vjetruar, por dëshmitarët janë gjithnjë e më të moshuar. Në Policinë e Kosovës, në të kaluarën, krimet e luftës janë trajtuar në kuadër të hetimeve të krimeve të rënda”.
“Kemi mundësuar gjykimin në mungesë të kriminelëve të luftës, madje që në vitin 2019. Gjatë këtij mandati kemi bërë ndryshime të nevojshme ligjore që kriminelët serbë të luftës të përballen me drejtësinë, sepse këto krime, përveç se nuk falen, as nuk vjetrohen kurrë. E për t’u dokumentuar me saktësi të gjitha krimet, kemi funksionalizuar Institutin e Krimeve të kryera gjatë luftës në Kosovë, për të cilën janë hapur, tashmë, 25 pozita të ekspertëve dhe zyrtarëve që do të punojnë”, ka thënë Kurti.