“Mjaft më me dënime qesharake. Mjaft më me sistem të çalë të drejtësisë. Mjaft më me dështim të shtyllave që do të duhej të mbronin gratë tona, qytetarët tanë”.
Kështu ka reaguar presidentja, Vjosa Osmani, pas vrasjes së 21-vjeçares në Qendrën për Punë Sociale në Ferizaj, nga bashkëshorti i saj.
Teksa i ka shprehur ngushëllime familjes së viktimës, Osmani ka kërkuar dënim maksimal për të dyshuarin.
“Edhe një burrë që vranë një grua! Sërish femicid!
Edhe një përkujtim se këta vrasës mizor të cilët ia kanë mësyer të shkatërrojnë jo veç jetën e grave, por edhe thelbin e shoqërisë sonë mund të ndalen vetëm nëse të gjithë bashkohemi e rizgjohemi si shoqëri kundër këtij fenomeni të tmerrshëm”, ka shkruar Osmani.
Pasditen e së premtes, një 21-vjeçare u vra me armë zjarri nga ish-bashkëshorti i saj, 36-vjeçar, në Qendrën për Punë Sociale të Ferizajt, i cili të plagosur ka lënë edhe vëllain e saj.
Për gjendjen shëndetësore të 15-vjeçarit ka dhënë detaje mjeku kujdestar i Spitalit të Ferizajt, Sefedin Fazliu.
“Rreth orës 15:00, sot kemi pranuar nga shërbimi i urgjencës një rast, ku pacienti ka qenë i plagosur në parakrahun e djathtë. Meqenëse gjendja e tij ka qenë stabile, ne e kemi dërguar menjëherë për radiografi. Në radiografi është vërtetuar se pacienti ka një plumb në parakrahun e djathtë dhe nga ana e ortopedit është intervenuar, është larguar plumbi”, ka thënë Fazliu për medie.
Më tej, mjeku kujdestar ka thënë se plumbi i është dorëzuar Policisë, ndërsa 15-vjeçari është dërguar në repartin e ortopedisë për trajtim të mëtutjeshëm të plagës së marrë.
“Plumbi i është dorëzuar Shërbimit Policor të Kosovës dhe pas imobilizimit të dorës, meqenëse ka qenë edhe frakturë e njërës kockë të parakrahut, është pranuar në repartin e ortopedisë pas trajtimit këtu në shërbimin e emergjencës dhe pas marrjes së terapisë adekuate, pacienti ka qenë jashtë rrezikut për jetë, dhe është pranuar në repartin e ortopedisë, ku vazhdon edhe trajtimin e mëtutjeshëm”, ka thënë Fazliu.