Vrasja që ndodhi mëngjesin e së martës, ku burri vrau gruan në Pejë, ishte tronditëse.
Përmes një postimi, Avokati i Popullit, jashtëzakonisht i shqetësuar me vrasjen e gruas që ndodhi sot në Pejë, dhe atë të gruas tjetër që ndodhi para pak ditësh në Ferizaj, dënon këto akte makabre.
“Me këtë rast ai i bënë thirrje autoriteteve kompetente të rrisin masat për sigurinë e jetës së grave për të mos toleruar asnjë lëshim ndaj secilit që mund të ketë përgjegjësi në këto raste.”
Gjithashtu, ai konsideron se këto akte brutale janë alarm i fundit se dukuria e vazhdueshme e dhunës me bazë gjinore dhe e dhunës në familje kërkon intervenime të menjëhershme dhe me të gjitha kapacitetet shtetërore dhe institucionale.
“Avokati i Popullit po ashtu shpreh shqetësimin e tij për gjuhën e përdorur në disa komente që përmbajnë gjuhë të papërshtatshme e që mund të nxisin urrejtje. Ai kërkon nga secili qytetar që të distancohet nga dhuna ndaj grave dhe vajzave duke i dënuar publikisht këto akte,” shkruhet në postim.
Me këtë rast, ai kërkon nga organet e sigurisë dhe të ndjekjes që të monitorojë dhe të marrin masa për të shmangur çdo koment qe përmban gjuhë që përhap apo nxit urrejtje.
Avokati i Popullit ndjen keqardhje dhe u shpreh ngushëllime familjeve të grave të vrara.