Është shenja që tregon se sa afër do iu vijnë punimet për zgjerimin e rrugës Kijevë-Dollc.
E të njëjtat po ndërhyjnë në pronën private të bizneseve të pozicionuara përgjatë rrugës.
Hamëz Fejza thotë se punimet rrezikojnë t’i mbyllin biznesin ngase e njëjta, do të pamundësoj qasjen në të.
“Zgjerimi i rrugës që po bëhet mua ma mbyll biznesin totalisht. Qe 15 vite jemi me djemtë në perëndim për me investu në Kosovë e sot me mu mbyll mu, me dal 10 punëtorë prej punës është tmerr. Zgjerimi i rrugës me pengon se kanë mundur në krahun e djathtë të devijojnë, kanë ardh këtu te unë. knej skam ka me hy. As 5 metra s’më mbesin me u kyç në objekt temin. Kjo është pronë private, nuk është e shtetit”, Hamëz Fejza, pronar i biznesit.
Pas humbjeve, Fejza thotë se 10 punëtorë kanë lënë punën.
Ndonëse ankesën e ka paraqitur, ai thotë se nuk iu ofrua zgjidhje.
E frikën e kanë edhe punëtorët të cilët qenë të parët që panë punimet pa paralajmërim.
“E bën shumë të vështirë sepse nuk ka kyçje e dalje ku don ti. Është pak e vështirë për punë po edhe për bllokim të kompanisë tonë e bllokon total. Është e vështirë me ndërru se ne jemi gati për punë, na e humb kohën dhe është e kushtueshme”, tha Luigj Palushaj, punëtor.
Punimet kanë nisur tash e tre javë e për ankesat e tyre, familja Fejza nuk ka pranuar përgjigje.
Televizioni ka pyetur edhe Ministrinë e Infrastrukturës për punimet dhe mundësitë e një zgjidhjeje alternative për qytetarët, por nga e njëjta nuk ka pranuar përgjigje.
I paqasshëm në telefon ka qenë edhe zëvendësministri Hysen Durmishi.
Muajin e kaluar, banorët e fshatrave Rixhevë, Gllarevë dhe Stapanicë të Klinës protestuan për disa ditë kundër fillimit të punimeve të zgjerimit të rrugës Kijevë-Dollc, duke thënë se rrezikohet që të mbyllen mbi 60 biznese.
Gjatë njërës prej protestave, banorët u përleshën me policinë, për çka tre prej tyre u arrestuan.