Projektligji për Komisionin e Pavarur të Mediave po kalon me radhë nëpër komisionet e Kuvendit, pas atij për Media që ia dha dritën e gjelbër.
Pavarsisht kritikave të shoqërisë civile e komenteve negative nga BE-ja për këtë projektligj, megjithatë puna për finalizimin e tij nuk po ndalet.
Por kritikën e saj nuk po e ndal as juristja për të drejtën e medias, Flutura Kusari, që thotë se nëse ky projektligj bëhet ligj, do t’i shkaktohet dëm i pariparueshëm lirisë së medias.
“Këshilli i Evropës ka japë kritika tepër të ashpra, për projektligjin e KPM-së dhe Kuvendi në vend që me i marr ato seriozisht, nuk e ka zbatu në shumicën e tyre, tash kemi një projektligj që nuk është në përputhje me standardet dhe kriteret e Bashkimit Evropian”, ka thënë Kusari.
Xhemajl Rexha, i cili udhëheq Asociacionin e Gazetarëve thekson sërish problematikat e projektligjit.
“Kërkesat tona nuk janë të jashtëzakonshme, pra ka të bëjë me faktin që nuk është koha e duhur dhe mënyra e duhur e propozuar nga qeveria për të kontrolluar kontentin e mediave online, kërkesë tjetër është që mos tu lejohet partive politike, dhe grupeve religjioze që të hapin kanalet e tyre. Asnjëherë e sidomos në kohë zgjedhjesh”, ka thënë Rexha.
Projektligji parasheh që numri i anëtarëve të KPM-së të rritet nga 7 në 11, çka shoqëria civile po e konsideron këtë si tendencë për shtrirje të ndikimit në një institucion të pavarur.