Për nder të rolit dhe të kontributit në ndaljen e gjenocidit dhe mbështetjen e çlirimit të Kosovës dhe në shenjë respekti e mirënjohjeje, i pari i AAK-së, Ramush Haradinaj, i ka ndarë medaljen, “Me besim në Zot Atdhe e Shtet”, ish-kryeministrit britanik, Tony Blair.
Haradinaj ka thënë se populli i Kosovës i është përgjithmonë falënderues Blair-it për mbështetjen dhe angazhimin e tij për Kosovën.
“Me respekt dhe mirënjohje, për shërbimin, rolin dhe kontributin e tij në ndalimin e gjenocidit, mbështetjen e çlirimit të Kosovës dhe mbrojtjen e të drejtës sonë për një shtet të pavarur, Kryeministrit Tony Blair, në shënimin e 25-vjetorit të Çlirimit, i dedikova medaljen “Me Besim në Zot, Atdhe e Shtet”.
“Kontributi i Shkëlqesisë së Tij, z. Blair, për lirinë e popullit të Kosovës, janë vetëm një dimension i lidershipit të tij të jashtëzakonshëm evropian dhe global, i cili tashmë ka hyrë në kapitullin e pashlyer të historisë britanike, shqiptare dhe botërore. Populli i Kosovës është përgjithmonë falënderues për mbështetjen dhe angazhimin e Kryeministrit Tony Blair në realizimin e ëndrrës shekullore për liri dhe pavarësi”, ka shkruar Haradinaj në Facebook.