Kryetari i LDK-së, Lumir Abdixhiku, ka uruar Shtetet e Bashkuara të Amerikës në 248-vjetorin e shpalljes së pavarësisë.
Abidxhiku ka thënë se 4 korriku i vitit 1776, shpallja e pavarësisë së ShBA-ve padyshim shënon datën e lindjes së një vendi që identifikon luftën për lirinë e të gjithë popujve, për demokracinë dhe prosperitetin nëpër botë.
“Në historinë politike të krijimit të shteteve, SHBA-të janë themelues dhe pishtarë i të drejtës universale për të jetuar të lirë secili popull kudo në botë.”
Duke shtuar se SHBA janë sinonim i kombit të madh që gjithmonë janë në detyrë për një botë paqësore.
“Sot, Shtetet e Bashkuara të Amerikës janë sinonim i kombit të madh, që angazhohet përherë për një botë më paqësore dhe më të sigurt. Ato janë motiv dhe model i shumë popujve anekënd globit për liri, paqe e demokraci.”
Po ashtu, shton se Shtetet e Bashkuara të Amerikës për Kosovën do të jenë gjithmonë aleat të përhershëm.
“Edhe për Kosovën, SHBA-të kanë qenë, janë dhe do të mbesin aleatë të përhershëm strategjikë, pa mbështetjen e të cilëve vendi ynë do ta kishte të pamundur lirinë, krijimin dhe konsolidimin e shtetit. Aleanca me ShBA-të është e përmbledhur qartë në postulatin e atit themeltar të Republikës, Presidentit Historik Rugova: ‘Kosova shtet i pavarur e sovran, i integruar në NATO e BE, dhe me miqësi të përhershme me Shtetet e Bashkuara të Amerikës’. Vizioni politik i yni është i qartë; duhet ta ndjekim orientimin natyral politik drejt vlerave perëndimore e integrimin në strukturat euro-atlantike.”