Edhe vet kryekuvendari Glauk Konjufca kishte dyshime një ditë më parë rreth asaj se çka rekomandonte Bashkimi Evropian rreth ligjit për Komisionin e Pavarur të Mediave.
“Nuk mundet me kanë pjesërisht, ose është kundër, ose pro, nuk ka pjesërisht”.
Megjithatë, kryetari i Komisionit parlamentar për Media, Valon Ramadani thotë se amendamentet e tij nuk përmbajnë asgjë negative.
Pavarësisht kritikave për mos harmonizim të ligjit me standardet e BE-së, megjithatë Ramadani e thotë të kundërtën.
“Ekspertja e BE-së në raportin që e ka dorëzu, në faqen 39, projektligji është në harmoni me direktivat e Bashkimit Evropian, jemi tu fol për projektligjin nëse ia shtojmë edhe amendamentet ku janë 93”, ka thënë Ramadani.
Projektligji i miratuar të enjten, parasheh licencimin dhe kontrollimin e mediave online që prodhojnë video prej KPM-së, më herët në këtë organ kanë qenë të obliguara që të regjistrohen vetëm mediat audio-vizuale.
Sipas këtij projektligji, mediat që funksionojnë si organizata joqeveritare do të duhen të hapin kompani që t’i plotësojnë kushtet e licencimit nga KPM-ja.
Po ashtu, mediat duhet të marrin leje prej KPM-së në rast të ndryshimit të pronësisë mbi 10 për qind.
E kryetari i Asociacionit të Gazetarëve të Kosovës, Xhemalj Rexha tregon se çka kanë të keqe këto ndryshime.
“Ne konsiderojmë që fakti që i jepet kjo kompetencë KPM-së është, shumë shumë e hershme dhe nuk ka kapacitet për të i kontrolluar mediat online, dhe nuk është mjaftueshëm e pavarur politikisht për ta bërë një gjë të tillë, e do bëhet më shumë e varuar me këtë ligj me faktin që numri i anëtarëve rritet nga 7 në 11-të, që ne e shohim si përpjekje për ta mbushur me njerëz të partisë politike në pushtet”, ka thënë Rexha.
Kundër është edhe juristja për të drejtat e medias Flutura Kusari. Ajo jep edhe disa arsye të tjera, shkaku i të cilave, sipas saj, ligji është i dëmshëm.
“Të gjitha garancionet që kanë garantuar pavarësinë e këtij institucioni janë zhdukur, duke mundësuar që kryetari të emërohet direkt nga deputetët dhe jo nga anëtarët si ka qenë deri tani, nëse ai është i mund ta mbajnë një mandat, por nëse deputetët humbin besimin në të, ai mund të shkarkohet lehtësisht”, ka thënë Kusari.
Ky projektligj u miratua më 59 vota pro, dhe 2 abstenime.