Ministri kosovar i Mbrojtjes, Armend Mehaj, merr pjesë në takimin e Grupit të Kontaktit të Mbrojtjes së Ukrainës (UDCG) në Shtabin e Përgjithshëm të NATO-s në Bruksel.
Ky takim është organizuar dhe kryesuar nga Sekretari i Mbrojtjes i Shteteve të Bashkuara të Amerikës, Lloyd J. Austin III.
Në këtë takim, ministri Mehaj ka thënë se “agresioni i Federatës Ruse ndaj Ukrainës na detyroi ta shikojmë çështjen e sigurisë globale krejt ndryshe, veçanërisht për vendet më të vogla që përballen me kërcënime të ngjashme”.
Mes të tjerash, ai ka thënë se “Qeveria e Republikës së Kosovës ka dënuar pushtimin rus të Ukrainës dhe ka vendosur sanksione në përputhje me ato të Shteteve të Bashkuara dhe Bashkimit Evropian”.
“Qeveria e Republikës së Kosovës ka hartuar një program për të pritur gazetarët ukrainas, gjatë këtyre kohërave të vështira me mandatin e rezolutës së votuar nga Kuvendi i Republikës së Kosovës. Po ashtu, Qeveria e Republikës së Kosovës ka ndarë një fond të veçantë për ndihmë për Ukrainën dhe është gati të strehojë 5000 refugjatë”, shtoi Mehaj.
Ai u takua me homologet e tij nga Kanada, Kroacia, Polonia e vende të tjera.
Në fund të fjalës së tij, Mehaj ka thënë se “në varësi të zhvillimeve të ardhshme, Qeveria e Republikës së Kosovës do të bëjë gjithçka në kapacitetin dhe fuqinë e saj, për të ofruar ndihmën e saj për Ukrainën dhe për të qëndruar së bashku me NATO-n dhe aleatët e saj, për të arritur synimin përfundimtar që është liria për Ukrainën”.
Bashkë me ministrin Mehaj, në takimin e Grupit të Kontaktit të Mbrojtjes së Ukrainës (UDCG), në Shtabin e Përgjithshëm të NATO-s në Bruksel, ka marrë pjesë edhe komandanti i FSK-së, gjeneralmajori Bashkim Jashari.