Insistimi i Qeverisë së Kosovës për hapjen e Urës së Ibrit po vazhdon edhe tutje.
Të mërkurën kompania e kontraktuar nga Ministria e Planifikimit Hapësinor ka filluar me fazën e dytë dhe të fundit praktike, që është testimi për peshën e automjeteve që mund të lëvizin mbi urë.
Një herë është testuar vetëm kalimi i kamionit bosh e pastaj edhe kamioni i ngarkuar.
Poshtë saj janë vendosur mjetet adekuate për të vlerësuar qëndrueshmërinë e urës e punëtorët e kompanisë po shikojnë çdo detaj nga kjo matje.
Rezultat final nuk ka akoma sepse të dhënat e marra nga ditët e sotme do të analizohen në ditët në vazhdim.
Ai që kishte ardhur tek Ura e Ibrit, siç tha ai, për t’i parë punimet nga afër, zv.ministri i Infrastrukturës, Hysen Durmishi, tha se marrja e rezultateve finale është çështje ditësh.
“Sa të përfundojnë testimet, aparatura është shumë moderne që është duke u aplikuar këtu për testime të stabilitetit dhe besoj që për dy-tri ditë do ta kemi raportin final”, ka thënë Durmishi.
Sipas tij, kjo urë është mjaft e qëndrueshme.
“Teorikisht ka mundësi, në bazë të asaj që kam pa unë gjatë vizitave të mija, kjo urë është shumë stabile, është një ndër më të fortat që i kemi në Kosovë”, ka shtuar Durmishi.
Të gatshëm të zbatojnë çdo urdhër janë edhe Policia e Kosovës në veri të vendit.
“Ne nuk kemi ndonjë informacion që kjo urë është duke u hapur tash, nëse merret ndonjë vendim ose vjen ndonjë vendim ndërmjet hierarkisë tonë komanduese, atëherë i marrim masat e nevojshme”, ka thënë Veton Elshani.
Gjatë kryerjes së testimit të stabilitetit të urës, procesin e kanë përcjellë nga afër si zakonisht karabinierët italianë, por si rrallëherë aty ishin KFOR-i gjerman.
Misioni paqëruajtës, KFOR, ka kërcënuar se do të intervenojnë për “çfarëdo zhvillim që mund të ndikojë në ambientin e sigurisë dhe stabilitetin rajonal, duke respektuar plotësisht mandatin që buron nga OKB-ja”.