Presidentja Vjosa Osmani ka përkujtuar sot 23-vjetorin e sulmit tragjik të 11 shtatorit 2001 në Shtetet e Bashkuara të Amerikës, një ngjarje që, sipas saj, ndryshoi përgjithmonë rrjedhën e historisë dhe la gjurmë të pashlyeshme në zemrat e familjeve të viktimave dhe gjithë botës demokratike.
Në një postim në Facebook, Osmani theksoi se 11 shtatori ishte një ditë që solli tmerr dhe humbje të pakuptimtë për afër 3,000 jetë, duke kujtuar brishtësinë e paqes dhe dhimbjen e thellë të shkaktuar nga ky akt terrorist.
“11 shtatori- ditë dhimbjeje, kujtese dhe solidariteti të palëkundur
Sot shënohet 23-vjetori i sulmeve tragjike të 11 shtatorit 2001, ditë, e cila ndryshoi përgjithmonë rrjedhën e historisë dhe la gjurmë të pashlyeshme në zemrat e familjeve të viktimave dhe gjithë botës demokratike. Tmerri dhe humbja e pakuptimtë e afër 3000 jetëve na kujtojnë brishtësinë e paqes dhe dhimbjen e thellë, të cilën e ka shkaktuar ky akt terrorist.
Imazhet, pikëllimi dhe ankthi mbeten të gdhendura në kujtesën tonë kolektive.
Në këtë ditë ne gjejmë forcën në unitet, duke qëndruar përkrah popullit amerikan, si gjithmonë, në mbrojtje të paqes, drejtësisë dhe një të ardhmeje më të mirë!”, ka shkruar Osmani në Facebook.