Sot është mbajtur një takim mes përfaqësuesve të nivelit qendror dhe atij lokal, ku ndër të tjera është diskutuar edhe çështja e qenëve endacakë.
Kryeministri Albin Kurti theksoi se menaxhimi efikas i kësaj çështjeje kërkon një koordinim të plotë midis dy niveleve, qendror dhe lokal.
Ai u shpreh se Qeveria është e gatshme të bashkëfinancojë zgjidhjet bazuar në nevojat reale, duke synuar sigurinë e qytetarëve nga sulmet e qenëve endacakë, që janë bërë një shqetësim i përditshëm.
“Ndër temat që duam t’i trajtojmë në këtë mbledhje të përbashkët tonën, është një çështje e cila është bërë më e rëndë me kalimin e kohës, e kjo është e qenve endacakë, përkatësisht menaxhimi efikas, i cili kërkon koordinim të plotë të dy niveleve. Duhet të kuptojmë që ministritë e linjës dhe komunat duhet të përcaktojnë vend lokacionet për ndërtimin e qendrave të trajtimit të përkohshëm. Komunat duhet të vazhdojnë fushatën me kastrim, sterilizim dhe vaksinim, si dhe të menaxhojnë shitjen e mbarështimin e pakontrolluar, duke i dhënë fund luftërave me qen. Informacionet tregojnë se në disa komuna organizohen luftëra me qen dhe si rezultat krijohen laboratorë shumimi. Qentë më pas braktisen dhe sulmojnë. Qeveria është e gatshme të bashkëfinancojë bazuar në nevojat reale, duke i siguruar qytetarët nga sulmet e qenve endacakë, të cilët janë bërë lajme gati të përditshme në vendin tonë”, ka thënë Kurti.