Presidentja e Komisionit Evropian, Ursula von der Leyen, ka thënë se Serbia duhet të vendosë se në anën e kujt dëshiron të jetë.
Ajo ka theksuar se Bashkimi Evropian do që Serbia të jetë në anën e saj.
Por, për këtë sipas saj duhet argument i qartë se Serbia ndan vlera të njëjta me BE-në, si sundimi i rendit dhe ligjit.
“Ne e duam Serbinë me ne, por për këtë na duhen prova të qarta se vendi ndan vlerat tona, si sundimi i ligjit dhe demokracia, dhe se refuzon pushtimin rus”, ka thënë Von der Layen në një intervistë për të përditshmen austriake, Wiener Zeitung dhe Kleine Zeitung.
Von der Leyen ka potencuar se Serbia duhet të qartësohet edhe sa i përket kundërshtimit të pushtimit të Ukrainës nga Rusia.
E kjo nënkupron sipas saj, edhe vënien e sanksioneve ndaj Rusisë për agresionin që po kryen në Ukrainë.
E pyetur se sa është i lidhur Ballkani Perëndimor me statusin e Ukrainës dhe çfarë mund t’u ofrohet atyre vendeve, ajo theksoi se pothuajse të gjitha vendet e Ballkanit Perëndimor janë në rrugën evropiane larg Ukrainës, shkruan B92.
“Shpresoj se do të gjendet një zgjidhje përmes së cilës përfundimisht do të mund të përmbushet premtimi për nisjen e negociatave. Është në dorën e vendeve kandidate se sa shpejt do të lëvizin në këtë proces”, është shprehur ajo, derisa ka folur për perspektivën e vendeve të Ballkanit Perëndimor drejt BE-së.