Flamur Kabashi nga Instituti i Kosovës për Drejtësi (IKD), i ftuar në emisionin “FIVE”, në një lidhje direkte tha se IKD-ja në muajin dhjetor ka publikuar një raport rreth deklaratave të dhëna nga partia në pushtet dhe partitë tjera drejt Prokurorisë Speciale.
Sipas Kabashit këto konceptoheshin si ndërhyrje në sistemin e drejtësisë.
“Kemi parë deklaratat e deputetëve në drejtim të Prokurorisë Speciale të Kosovës, deklarata të cilat sipas konventës evropiane për të drejtat e njeriut, janë deklarata që nënkuptohen si ndërhyrje në sistemin e drejtësisë, për shkak se pushtetet janë të ndara dhe pushteti gjyqësor duhet të funksionojë në mënyrë të pavarur e të pandikuar”, tha Kabashi.
Sa i përket deklaratave që janë bërë nga deputetët, pas zhvillimit të hetimeve në çështjen e amabalazhuesve të ujit, Kabashi thotë që këto janë ndërhyrje në punën e Prokurorisë Speciale.
“Deklaratat që janë bërë pas zhvillimit të hetimeve që po bën Prokuroria Speciale në rastin e ambalzhuesve dhe deklaratat e tjera që janë dhënë nga zyrtarët e partisë në pushtet si rasti ndaj Nagip Krasniqit, janë deklarata që nuk duhet të jipen, ato nënkuptohen si ndërhyrje në sistemin e drejtësisë”, shtoi Kabashi.
E arsye e përceptimit si ndërhyrje në punën e Prokurorisë Speciale, Kabashi thotë se është për shkak të pozitës si zyrtarë, pasi sipas tij nuk janë deklarata të “qytetarëve të thjeshtë”.