Policia e Kosovës ka njoftuar se është arrestuar edhe i dyshuari tjetër për plagosjen e dyfishtë me armë zjarri që ndodhi në “Kodrën e Trimave” të enjten në Prishtinë.
Policia në raportin ditor bëri të ditur se i prangosuri u dërgua në mbajtje, me vendim të prokurorit.
Ndryshe, Policia e Kosovës ka dhënë detaje lidhur me plagosjen që ndodhi dje pasdite në lagjen “Kodra e Trimave” në Prishtinë, ku një burrë dyshohet se i plagosi dy të tjerë.
Policia përmes raportit 24 orësh ka bërë me dije se në vendin e ngjarjes janë gjetur dhe janë sekuestruar disa gëzhoja dhe një veturë me targa vendore.
Gjithashtu, lidhur me rastin në një lokacion tjetër është gjetur dhe është sekuestruar edhe një veturë me targa vendore e cila ishte e goditur nga plumbat.