Ministrja e Drejtësisë, Albulena Haxhiu, ka thënë se dhuna ndaj grave përbën pengesë të madhe për zhvillimin shoqëror.
Misioni i Bashkimit Evropian për Sundim të Ligjit në Kosovë (EULEX), në bashkëpunim me partnerin implementues OJQ Assist Kosova, të mërkurën ka organizuar diskutim të nivelit të lartë në formë të tryezës së rrumbullakët me temë “Lufta kundër dhunës ndaj grave dhe vajzave: Politikat dhe avokimi. Zbatimi dhe rruga përpara”.
Haxhiu ka thënë se dhuna ndaj grave duhet të jetë temë që na për bashkon si shoqëri dhe institucione.
“Kemi dhënë kontribut, kjo nuk është vetëm një çështje që prek individë por dhe shoqërinë tonë në tërësi”, tha Haxhiu
Ajo ka thënë se dhuna ndaj grave është një pengesë e madhe për barazinë gjinore, për drejtësinë dhe për zhvillimin shoqëror.
Haxhiu shtoi se për parandalimin e dhunës ndaj grave janë miratuar sërë masash, si dhe në këtë drejtim ka theksuar se është plotësuar protokolli për trajtimin e dhunës seksuale.
Emily Rakhorts nga EULEX ka folur për luftën kundër dhunës ndaj grave dhe vajzave, si dhe për rëndësinë e zbatimit të Konventës së Stambollit.
Ndërsa, Arbneshë Ajvazi nga Policia e Kosovës ka thënë se dhuna në familje është bërë tashmë dukuri që kërkon vëmendjen e të gjithëve si dhe një qasje shumë profesionale. /EO