Policia e Shqipërisë ka njoftuar se të premten e 24 qershorit vazhdon riatdhesimi i shtetasve shqiptarë, të cilët janë kapur duke qëndruar në mënyrë ilegale në Angli dhe Francë.
Sipas njoftimit të policisë, gjatë dy ditëve të fundit në Rinas, në territorin britanik dhe në atë francez, kanë mbërritur, me dy avionë charter nga Anglia dhe Franca. 72 shtetas shqiptarë.
“Në charter-in e parë që mbërriti nga Anglia, ndodheshin 24 shtetas shqiptarë, nga të cilët 21 shtetas shqiptarë që e kanë përfunduar vuajtjen e dënimit në territorin britanik, për vepra të ndryshme penale të kryera atje dhe 3 shtetas të tjerë, për qëndrim të parregullt në Angli. Këta shtetas, pasi iu nënshtruan procedurave të intervistimit dhe verifikimit, u lanë të lirë”, ka njoftuar Policia e Shqipërisë.
Sipas policisë, në charter-in e dytë që ka mbërritur nga Franca, ndodheshin 48 shtetas shqiptarë, të cilët ishin me qëndrim të parregullt ne territorin francez.
Disa prej tyre janë kapur në tentativë për të shkuar në Angli, dhe të tjerët janë shtetas që e kanë përfunduar vuajtjen e dënimit, për vepra të ndryshme penale të kryera në Francë.