Komisioni Qendror i Zgjedhjeve [KQZ] ka thënë se integriteti i votës së 9 shkurtit nuk është cenuar e se pavarësisht problemeve në proceset e deritashme, rezultatet përfundimtare do të jenë të sakta.
KQZ-ja në një komunikatë për media të mërkurën ka thënë se është e “përkushtuar maksimalisht” që të kryhet sa më shpejt numërimi i votave të kandidatëve për deputetë dhe të bëhet verifikimi i votave të subjekteve politike nga formularët e plotësuar në vendvotime, të numërohen votat me kusht, atyre të personave me aftësi të kufizuara dhe votat nga votimi jashtë Kosovës.
“KQZ është e përkushtuar maksimalisht që të gjitha këto procese të kryhen në kohën më të shpejtë të mundur, por duke siguruar saktësi në evidentimin e vullnetit të çdo votuesi. KQZ sqaron se integriteti i votës nuk është i cenuar dhe pavarësisht vonesave që janë shkaktuar si pasojë e problemeve me platformën elektronike, rezultatet përfundimtare do të jenë të sakta dhe të bazuara në vullnetin e qytetarëve të shprehur përmes votës së tyre”, thuhet në njoftim.
Një ditë më parë, nisi numërimi i votave për kandidatët për deputetë dhe verifikimi i votave të subjekteve politike në Prishtinë, Lipjan, Obiliq e Partesh. Pos Prishtinës që ka pasur probleme të herëpashershme, sipas KQZ-së në komunat tjera po zhvillohet procesi pa ndonjë problem.
Gjatë ditës do të nisë numërimi i votave edhe në qendra të tjera, ka njoftuar KQZ-ja.
KQZ-ja ka thënë po ashtu se i ka bërë thirrje Prokurorisë dhe institucioneve të tjera të sigurisë që ta sqarojnë situatën e problemeve të mosfunksionimit të platformës online për rezultatet përfundimtare.