Kryetari i Prishtinës, Përparim Rama ka njoftuar se mëngjesin e sotëm e ka nisur me plane të reja për Ku’zinën qendrore dhe avancimin e programit për ushqyerjen e shëndetshme.
Rama thotë se investime në këtë kuzhinë janë të dukshme.
“Ku’zina qendrore mbulon grupet më të ndjeshme të shoqërisë sonë, duke përfshirë fëmijët e Komunës së Prishtinës përmes programit të mësimit gjithëditor dhe deri tek shtëpitë e të moshuarve. Investimet e Komunës në këtë kuzhinë janë të dukshme, dhe sot menyja e ushqimit përgatitet sipas rekomandimeve të nutricistëve, duke siguruar një dietë të shëndetshme dhe të balancuar për të gjithë”, shkruan Rama.
Ai ka pohuar se “përkushtimi ynë për kuzhinën qendrore po rritet, duke përfshirë edhe bashkëpunimin me fermerët dhe sektorin privat”.
“Fermerët do të furnizojnë kuzhinën me produkte bio të vendit, të cilat subvencionen nga Komunës së Prishtinës, duke krijuar kështu një ekonomi qarkore”, shtoi tutje ai.
Gjithashtu, ai ka pohuar se si pjesë e zhvillimit të ku’zinës, do të krijohet një treg i gjelbër, i destinuar për fermerët e Kryeqytetit, duke ofruar mundësi për ta që të shesin produktet e tyre të freskëta dhe bio direkt tek qytetarët.
“Me këtë, kuzhina do të zgjerojë menynë e saj, duke ofruar mundësi edhe për sektorin privat dhe çdo person që dëshiron të konsumojë ushqime të freskëta, të prodhuara nga fermerët tanë. Gjithashtu, një hapësirë e madhe do të dedikohet për organizimin e festivaleve stinore, të hapura për qytetarët, ku ata do të mund të shijojnë ushqime të freskëta dhe të gëzojnë aktivitete të ndryshme që promovojnë jetesën e shëndetshme dhe bashkëveprimin komunitar”, ka përfunduar ai.