Presidenti i Rusisë, Vladimir Putin, ka vizituar të mërkurën trupat ruse të angazhuara në kundërofensivën në rajonin e Kurskut, sipas raportimeve të mediave shtetërore ruse.
Kjo është vizita e tij e parë në këtë zonë perëndimore që nga momenti kur Ukraina mori kontrollin e një pjese të saj.
“Jam duke llogaritur në faktin se të gjitha detyrat e luftës me të cilat njësitë tona përballen do të arrihen, dhe territori i rajonit të Kurskut shpejt do të jetë plotësisht i çliruar nga armiku”, është shprehur Putin gjatë vizitës së tij.
Sipas agjencisë shtetërore të lajmeve “Tass”, presidenti rus ka zhvilluar një takim në një pikë komanduese ushtarake, ku është informuar nga shefi i shtabit të ushtrisë ruse, Valery Gerasimov.
Ky i fundit i ka raportuar Putinit mbi situatën në front dhe ka njoftuar se një numër i madh i ushtarëve ukrainas janë kapur gjatë luftimeve.
“Ushtria ukrainase, duke parë se rezistenca është e kotë, ka filluar të dorëzohet. Deri më tani, 430 luftëtarë janë kapur”, ka deklaruar Gerasimov në takimin me Putinin.
Ndërkohë, rajoni i Kurskut mbetet një vatër e përplasjeve të ashpra mes forcave ruse dhe ukrainase, teksa po zhvillohen negociata për një armëpushim të mundshëm.