Kryetari i Komunës së Preshevës, Shqiprim Arifi, të hënën e 27 qershorit do të udhëtojë drejt Hagës, për t’u takuar me ish-kryetarin e Kuvendit të Kosovës, Kadri Veselin, i cili po mbahet në paraburgim në Hagë.
Kështu ka bërë të ditur Arifi përmes një postimi në llogarinë e tij në Facebook, ku ka thënë se beson fuqishëm në pastërtinë e luftës së luftëtarëve të UÇK-së.
Ai është shprehur i shqetësuar në lidhje me procesin, që sipas tij, është i padrejtë ndaj burrështetasve të Kosovës.
“Të shqetësuar me procesin e padrejtë ndaj burrshtetasve tanë, nesër do të qëndroj në Hagë për të vizituar ish kryeparlamentarin Kadri Veseli. Të bindur, ne besojmë fuqishëm në pastërtinë e luftës çlirimtare në krye me ata që sot bartin emrin e Lirisë”, ka shkruar ai.
Ndryshe, kryetari i Kuvendit të Kosovës, Glauk Konjufca, të dielën e 19 qershorit kishte takuar në Hagë, ish-presidentin e Kosovës, Hashim Thaçi dhe ish-kryeparlamentarin Kadri Veseli.
Kështu kishte bërë të ditur për Portali D, Ilir Kërçeli – shef i kabinetit të kryetarit të kuvendit.
“Sot kemi përfunduar vizitën edhe tek Thaqi edhe tek Veseli”, kishte thënë Kërçeli.
Kryeparlamentari Konjufca teksa ka qëndruar për vizitë në Hagë, është takuar me disa nga ish-krerët e Ushtrisë Çlirimtare të Kosovës, që po mbahen në paraburgim.
Gjatë të shtunës së 18 qershorit, Konjufca kishte takuar ish-deputetin e Lëvizjes Vetëvendosje, Rexhep Selimin, ish-zëdhënësin e UÇK-së, Jakup Krasniqin si dhe Pjetër Shalën.
“Sot bashkë me kryeparlamentarin Konjufca filluam vizitat në Hagë, takuam ish-kryeparlamentarin Jakup Krasniqi e Pjetër Shalën, pas drekës takojmë gjeneral Rexhep Selimin. Kurse nesër ish-presidentin Hashim Thaçi dhe ish-kryeparlamentarin Kadri Veseli, e po ashtu edhe të dënuarit nga shoqata e veteranëve të luftës, Hysni Gucati e Nasim Haradinaj”, ka shkruar Kërçeli.
Ndër të tjera, kryeparlametari Konjufca ka thënë se këtë vizitë po e bëjnë me qëllim që të shohin nga afër se si po trajtohen ish-krerët e UÇK-së.