Policia e Kosovës ka arrestuar 19-vjeçarin e dyshuar për vrasjen e rëndë të bashkëmoshatarit të tij që ndodhi mbrëmjen e së dielës në Vushtrri.
Lajmin e ka konfirmuar për Dukagjinin, zëdhënësi i Policisë për rajonin e Mitrovicës, Avni Zahiti, i cili ka theksuar se hetuesit policorë kanë sekuestruar si prova materiale tri gëzhoja të gjetura në vendin e ngjarjes.
Nga hetimet e para u konfirmua se një person kishte shtënë me armë në drejtim të 19-vjeçarit A.Z., i cili u dërgua në Spitalin e Vushtrrisë, ku u konfirmua se kishte ndërruar jetë. Me urdhër të prokurorit, trupi i pajetë u dërgua në Institutin e Mjekësisë Ligjore për obduksion.
Ndërkohë, pas veprimeve hetimore, është arrestuar i dyshuari B.D., 19 vjeçar.
Gjatë arrestimit, policia i konfiskoi një pistoletë që dyshohet se është arma e krimit.
Gjatë bastisjes në shtëpinë e të dyshuarit, u gjet dhe u konfiskua edhe një armë e gjatë me pesë fishekë.
Me vendim të prokurorit, të dyshuarit i është caktuar masa e ndalimit policor, ndërsa hetimet po vazhdojnë për zbardhjen e plotë të rrethanave të kësaj vrasjeje të rëndë.