Hykmete Bajrami, shefe e Grupit Parlamentar të LDK-së, tha se partia e saj do të bëjë kallëzim penal ndaj anëtarëve të Qeverisë, që janë zgjedhur deputetë dhe të cilët bënë sot betimin, për ushtrim të funksioneve ekzekutive.
Ajo tha se neni 70 i Kushtetutës thotë “qartë se mandati i deputetit nis me datën e certifikimit të rezultateve”.
Sipas saj, që nga 27 marsi – kur është certifikuar rezultati zgjedhor – anëtarët e Qeverisë – të betuar tashmë si deputetë – kanë bërë shkelje, duke mbajtur postin ekzekutiv.
“Pastaj do të shohim hapat për Gjykatën Kushtetuese”, tha ajo.
Sa i përket kryeparlamentarit, Bajrami tha se LDK nuk ka asnjë kandidat të pranueshëm për këtë post nga LVV-ja.
Vlen të përmendet se, propozimi i Lëvizjes Vetëvendosje për kreun e Kuvendit, deputetja Albulena Haxhiu nuk i ka marrë votat e mjaftueshme për zgjedhjen e kryekuvendarit.