Vlora Dumoshi nga radhët e LDK-së ka reaguar ashpër ndaj Ministrisë së Kulturës, duke e akuzuar se po abuzon me emrin e saj lidhur me ndalimin e punimeve në Komunën e Prishtinës.
Ajo në Facebook, ka sqaruar se gjatë kohës sa ishte drejtoreshë e Kulturës në Prishtinë (2010-2013), për herë të parë u ndërmorën hapa për përfshirjen e Qendrës Historike të Prishtinës në dokumentet strategjike komunale dhe investimin në asetet si Kulla e Sahatit, Hamami dhe Xhamia e Çarshisë.
Si ministre e Kulturës në Qeverinë Kurti I, Dumoshi thekson se e ka mbështetur dhënien e statusit të mbrojtjes për Qendrën Historike, por sipas saj, Qendra Rajonale për Trashëgimi Kulturore në Prishtinë nuk ka përcaktuar ende perimetrin e zonës mbrojtëse, siç kërkohet me ligj.
“Ftoj MKRS të mos e dezinformojë opinionin publik, pasi gjendja dhe dokumentet flasin se vetë ajo nuk e ka kryer punën e përcaktimit të perimetrit,” ka deklaruar Dumoshi, duke kërkuar që gjatë punimeve të sheshit të ruhet hapësira historike.