“Askush nuk mund ta heq Kosovën nga shpirti im”, kështu thotë një këngë nacionaliste serbe që i kushtohet festës së ashtuquajtur “Vidovdan”.
Kjo këngë i është kushtuar Betejës së Kosovës në të cilën serbët pretendojnë që kanë luftuar vetëm ata.
Por, historianët vendor po thonë që gjithë këtë situatë serbët e kanë keqpërdorur duke e deformuar historinë e vërtetë.
Frashër Demaj thotë se Beteja e Kosovës ka qenë luftë në mes ballkanasve dhe Perandorisë Osmane.
“Beteja e Kosovës është keqpërdorur dhe është keqinterpretuar shumë sidomos nga serbët për motive të ndryshme politike dhe prej shfaqjes të nacionalizmit serb në mënyrë krejt jodinjitoze të ashpër dhe ekspansioniste nga viti 1989-të kur është suprimuar autonomia e Kosovës, serbët janë motivuar nga beteja e humbur e Kosovës për të rritur nacionalizmin serb”, ka thënë Demaj.
Ndërsa profesori i historisë, Muhamet Mala interpretimin e historisë serbe e quan mitologji.
“Përgjegjësit kryesor për ruajtjen dhe përhapjen e mitit mbi betejën e Kosovës është Kisha Serbe, ajo edhe sot vazhdon të jetë një institucion që e ushqen këtë dhe këtu nuk është problemi i humbjes dhe fitores së kësaj beteje por tek përdorimi i serbeve për tu viktimizuar” është shprehur Mala.
Në vitin 1989-të, në kohën e udhëheqjes së presidentit serb Sllobodan Millosheviq, kremtimi i përvjetorit të Betejës së Kosovës u kthye në kulmin e nacionalizmit në ish-Jugosllavi, me shpalljen e siç thuhej bashkimit të Serbisë, përmes rrënimit të autonomisë së Kosovës. Ky kishte qenë edhe paralajmërimi i luftërave të përgjakshme që çuan në shkatërrimin e ish-federatës jugosllave.