Gjersa Italia po përballet me njërën nga thatësirat më të këqija në dekada, autoritetet italiane kanë vendosur që të mbyllin shatërvanet publike, pas shpalljes së gjendjes së jashtëzakonshme të rajonit të gjerë të Lombardisë.
Një masë e tillë nuk vlen për shatërvanët të cilët janë habitat i peshqve dhe bimëve. Njëherësh, vendasëve iu është kërkuar të reduktojnë sa më shumë përdorimin e ujit në banesa, raporton “Corriere della Sera”.
Mirëpo përveç kursimit të ujit, banorëve dhe pronarëve të bizneseve u është kërkuar që të mos e ulin ajrin e kondicionuar nën 26 gradë Celsius për të kursyer energjinë ngase përgjatë javës së kaluar, disa pjesë të qytetit kishin mbetur pa energji elektrike.
“Ne duhet të marrim masa dhe besojmë se është e drejtë të bëjmë pjesën tonë”, kishte deklaruar kryebashkiaku i Milanos, Beppe Sala.
Kjo thatësirë në Itali ka goditur veçanërisht rajonet veriore.
Të hënën e 27 qershorit, Shefi i Departamentit të Mbrojtjes Civile të Italisë, Fabrizio Curcio ka thënë se niveli i Posë ishte deri në 80% më i ulët. Përveç lumit “Po”, njëherësh nga thatësira është prekur edhe lumi Arno.
Gjendja e jashtëzakonshme pritet të shpallet edhe në rajone të tjera të vendit.
Kufizimet gjatë natës në përdorimin e ujit janë tashmë në fuqi, në disa qytete veriore, ndërsa shumë prej tyre varen nga furnizimi me ujë me kamion.
Për këtë krizë, Attilio Fontana, presidenti i Lombardisë, ka thënë se kjo thatësirë ishte më e keqja që rajoni kishte përjetuar ndonjëherë.