Këtë mëngjes erdhën në punë si zakonisht, por aty u pritën nga Policia e Kosovës.
Kjo, meqë Kompania Rajonale e Ujësjellësit “Mitrovica” kërkoi nga zyrtarët policorë t’i asistojnë në Fabrikën e Ujit në Zubin Potok, me kërkesë të Ministrisë së Ekonomisë.
Ky është objekti që është marrë nën kontroll nga Policia e Kosovës mëngjesin e sotëm së bashku me Policinë e Kosovës. Deri tani ishte duke u kontrolluar nga strukturat paralele serbe.
Nga Kompania Rajonale e Ujësjellësit nuk pranuan të flasin, kurse ministrja në detyrë e Ekonomisë, Artane Rizvanolli, reagoi me anë të një postimi në Facebook.
“Kjo fabrikë e ujit është aset kritik për furnizim të sigurt me ujë për mijëra qytetarë të Republikës së Kosovës në komunat veriore. Andaj, marrja nën kontroll e këtij aseti është çështje e sigurisë, e shëndetit publik dhe e shtrirjes së kontrollit institucional”, ka thënë Rizvanolli.
E nga Policia thanë se nuk patën ndonjë problem gjatë marrjes së fabrikës nën kontroll.
“Ne kemi pranuar një kërkesë për asistencë, për ujësjellësin për në veri e mandej edhe në Zubin Potok, që janë dy zyre, një fabrikë e ujit”, ka thënë ud. i drejtorit të Policisë për rajonin e veriut, Veton Elshani.
Ndërkaq, kryetari i kësaj komune, Izmir Zeqiri, tha që tash do ta kenë më të lehtë kryerjen e punëve të planifikuara.
“Gjithçka është menaxhuar nga direktivat e shërbimeve të Serbisë duke i shfrytëzuar dhe mund të themi duke i mbajtë nën okupim objektet pa ofruar shërbimet e nevojshme që kanë qytetarët”, ka thënë Zeqiri.
Ndërkaq, një aksion i ngjashëm dy ditë më parë u realizua në Mitrovicën Veriore, ku është mbyllur kompania paralele e ujësjellësit “Ibar”, dhe ka kaluar nën menaxhimin e KRU “Mitrovica”.
Këtë, si lajm të mirë e sheh asamblisti i kësaj komune, Betim Osmani, që tash pret investime nga kjo ndërmarrje, por edhe tek ky gyp në lagjen “Kroi i Vitakut” që ka shpërthyer tash e mbi një dekadë.
“Qysh në vitin 2021 kjo kërkesë është hedhur edhe në buxhetin e Mitrovicës së Veriut, por deri tani nuk ka pasur asnjë intervenim. Siç e shihni, gjithë ky ujë që rrjedh është ujë i pijshëm”, ka thënë Osmani.
Ndërkaq dje, ministri në detyrë i Punëve të Brendshme, Xhelal Sveçla, ka bërë të ditur se është kthyer në pronësi të komunës së Mitrovicës së Veriut objekti i cili deri tash ishte shfrytëzuar nga strukturat paralele, përkatësisht nga e ashtuquajtura Zyrë për Sport, Rini dhe Shërbime të Specializuara.