Ministri i Punëve të Jashtme të Gjermanisë, Johann Wadephul, ka reaguar pas fillimit të operacionit ushtarak të Izraelit ndaj Iranit, duke e cilësuar situatën si jashtëzakonisht të rrezikshme.
Sipas tij, ngjarjet e fundit përbëjnë një përshkallëzim serioz të konfliktit: Izraeli ka ndërmarrë sulme ndaj objekteve bërthamore iraniane, ndërsa Irani ka reaguar me qindra sulme me dron mbi territorin izraelit. Kjo përplasje ushtarake e natës së kaluar ka rritur ndjeshëm frikën për një konflikt të gjerë rajonal.
Gjermania ka dënuar ashpër sulmet iraniane, duke theksuar se:
“Ne dënojmë fuqishëm sulmin e pakontrolluar iranian ndaj territorit të Izraelit. Programi bërthamor i Iranit përbën një shkelje të Traktatit për Mospërhapjen e Armëve Bërthamore dhe përbën kërcënim serioz për të gjithë rajonin – veçanërisht për Izraelin.”
Ministri Wadephul ka nënvizuar se Izraeli gëzon të drejtën legjitime për të mbrojtur ekzistencën dhe sigurinë e qytetarëve të vet, por njëkohësisht ka bërë thirrje për përmbajtje dhe shmangie të përshkallëzimit të mëtejshëm.
Në përfundim, ai theksoi se Gjermania mbetet e përkushtuar ndaj diplomacisë dhe zgjidhjes paqësore të konfliktit, në koordinim të ngushtë me partnerët evropianë dhe Shtetet e Bashkuara.