Presidenti i Shteteve të Bashkuara të Amerikës (SHBA), Joe Biden i ka bërë thirrje Kongresit të miratojë miliarda dollarë fonde shtesë për të luftuar pandeminë COVID-19.
Kjo deklaratë e Presidentit Biden, erdhi të mërkurën pasi e morri dozën e katërt përforcuese kundër Covid-19, një ditë pasi rregullatorët federalë miratuan dozën e katërt përforcuese për persona të moshës 50 vjeçare e më lart.
Biden foli, gjersa administrata e tij kishte krijuar një webfaqe interneti për t’i ndihmuar qytetarët amerikanë të kenë qasje më të lehtë për testet, vaksinat si dhe trajtimet kundër virusit Covid-19. Po ashtu, në këtë web-faqe mund të shikojnë përditësimet e fundit për shkallën e infeksionit në zonat ku ata banojnë.
Bideni, u kërkoi autoriteteve amerikane të sigurojnë “menjëherë”, fonde shtesë për të garantuar furnizim të vazhdueshëm me mjete për ta luftuar pandeminë.
“Kongres, ne duhet të sigurojmë furnizim shtesë tani”, ka thënë Bideni, duke paralajmëruar për mungesë të vaksinave, testeve dhe trajtimeve. “Kjo nuk është partiake, është mjekësi”, ka shtuar Bideni.
Biden 79 vjeç, mori dy dozat e para të vaksinës kundër koronavirusit pak para se të merrte detyrën e presidentit dhe një dozë të parë përforcuese në shtator të vitit të shkuar.