Ish-kryetari i Gjykatës Kushtetuese, Enver Hasani, ka kritikuar ashpër sjelljen e kryeministrit Albin Kurti ndaj partive të tjera politike në lidhje me propozimin për nënkryetar të Kuvendit të Kosovës. Këto deklarata i dha Hasani në emisionin “Debat Plus” në kuadër të pjesës “Debat Analizë” me Ermal Pandurin lidhur me vendimin e Gjykatës Kushtetuese për konsistuimin e Kuvendit të Kosovës.
Hasani deklaroi se Kurti nuk është palë e autorizuar kushtetuesisht për të diskutuar apo vendosur mbi këtë çështje dhe se ndërhyrjet e tij janë forma e një shantazhi politik.
“Kurti mund të flasë vetëm për partinë e vet dhe mund të thotë se nuk e voton propozimin, por nuk ka të drejtë të marrë përsipër të diskutojë apo të caktojë për nënkryetarin. Kjo është shantazh politik,” tha Hasani.
Sipas tij, aktgjykimi i Gjykatës Kushtetuese është drejtuar te kryetari i ardhshëm i Kuvendit dhe forcat politike, jo tek Kurti apo individë të tjerë.
“Mënyra e sjelljes së kryeministrit Kurti ndaj partive të tjera është shantazh. Kurti nuk është palë e autorizuar me Kushtetutë për të diskutuar çështjen e nënkryetarit të Kuvendit. Ai mund të flasë vetëm për partinë e vet, kaq. Ai mund të thotë se nuk e voton propozimin, por ky propozim nuk i dërgohet as atij, as z. Dehari, por kryetarit të Kuvendit, pasi të zgjedhet. Gjykata Kushtetuese është dashur që këtë ta sqaronte në dispozitiv. Forcat politike janë adresantët e këtij vendimi, jo Kurti. Ai nuk është i autorizuar të marrë propozime për caktimin e nënkryetarit. Kjo mënyrë është shantazh politik. Në këtë proces nuk është i përfshirë populli shumicë në mënyrë direkte, përveç nëpërmjet votës. Çdo veprim ka kosto dhe kjo i bën më të forta politikat e pranuara në Ohër.”, tha Hasani.
Hasani: S’mund të caktohet afat, pa dhënë pasojat
Ish-kryetari i Gjykatës Kushtetuese, Enver Hasani, në një intervistë në Debat Plus në RTV Dukagjini, ka folur lidhur me vendimin e Gjykatës Kushtetuese për zgjedhjen e kryetarit të Kuvendit të Kosovës, duke thënë se ky vendim nuk është i qartë për politikën.