Në shumë qytete të Gjermanisë janë zhvilluar protesta nga taksistët, të cilët kanë shprehur pakënaqësinë e tyre ndaj kompanive të transportit privat si Uber dhe Bolt, që ofrojnë shërbime përmes aplikacioneve digjitale.
Shoferët kërkojnë krijimin e kushteve të barabarta konkurruese dhe shprehen kundër praktikave që çojnë në ulje të çmimeve dhe dëmtim të të ardhurave të tyre.
Në qytete të mëdha si Berlini, Frankfurti, Shtutgarti, Mainci, Wuppertali, Düsseldorfi, Boni dhe Këlni, protestat morën formën e autokolonave të gjata të përbëra nga qindra taksi.
Në Këln, mbi 500 taksi u mblodhën në kantierin Deutzer Werft dhe bllokuan disa rrugë kryesore, duke ndikuar ndjeshëm në trafikun e qytetit. Ndërkohë, në Düsseldorf protesta u zhvillua nën moton “Dita Kombëtare e Veprimit” me rreth 400 taksi pjesëmarrëse, ndërsa në Bon morën pjesë afro 250.
Protestat u shoqëruan nga prani e madhe e forcave të policisë për të siguruar rendin dhe sigurinë gjatë manifestimeve.
Drejtori i Përgjithshëm i Shoqatës Federale të Taksive dhe Makinave me Qira, Michael Oppermann, në një deklaratë me shkrim, theksoi se taksistët nuk janë kundër konkurrencës, por kërkojnë që ajo të jetë e drejtë dhe e rregulluar.
Ai kritikoi faktin që platformat e transportit nuk janë të detyruara të ndjekin struktura të rregulluara tarifash, duke shkaktuar ulje të të ardhurave për taksistët tradicionalë prej vitesh.