Artan Behrami, deputet i Partisë Demokratike të Kosovës (PDK), në emisionin FIVE në RTV Dukagjini, ka folur lidhur me seancën e nesërme dhe tentativën e 53-të për konstituimin e Kuvendit.
Behrami ka thënë se Gjykata Kushtetuese i ka dhënë “karton të kuq” Albin Kurtit javën e kaluar, dhe sipas tij, njëjtë ka vepruar edhe Gjykata Supreme po ashtu javën e kaluar.
“Qytetarët të cilët tashmë janë të bindur se arsyeja e bllokadës është Albin Kurti, po ashtu është një ‘karton i kuq’”, ka deklaruar ai.
“Bashkësia ndërkombëtare, ndonëse flet me gjuhë diplomatike, e di dhe është shumë e bindur se problemi kryesor është z. Kurti, i cili edhe më tutje i ka kapur institucionet e Republikës së Kosovës, e ka okupuar zyrën e kryeministrit dhe përmes Avni Deharit ka okupuar edhe zyrën e Parlamentit, dhe është duke u munduar të bëjë një bllokadë totale”, ka thënë ai.
Deputeti i PDK-së tutje ka deklaruar se në krye të shtetit nuk kemi më burrështetas të cilët kanë qenë të parashikueshëm, jo vetëm në marrëdhëniet me SHBA-të dhe aleatët ndërkombëtarë, por edhe me popullin e Kosovës.
“Tani kemi një deputet i cili është i paparashikueshëm, pra askush nuk e di se çfarë është duke u zier në kokën e tij, por ajo çfarë kemi parë, z. Kurti është i burgosur në botëkuptimet e tij kamikaze”, është shprehur Behrami.