Presidentja e Kosovës ka shprehur keqardhje të thellë për humbjen tragjike të tre qytetarëve në ngjarjen e rëndë në Gjilan dhe ka përcjellë ngushëllimet më të sinqerta për familjet e viktimave.
Në reagimin e publikuar nga Presidenca, ajo kërkon nga organet kompetente që autorët e këtij akti makabër të kapen sa më shpejt dhe të dalin para drejtësisë për të përballuar përgjegjësinë ligjore.
Presidentja ka theksuar se është për keqardhje që vitin e kaluar të njëjtit të dyshuar ishin liruar nga institucionet e drejtësisë pas një periudhe të shkurtër paraburgimi, pavarësisht veprave të rënda për të cilat akuzoheshin.
Në reagim, Osmani gjithashtu dënon manipulimin dhe keqinformimin e opinionit publik, duke iu referuar përdorimit të fotografive të të dyshuarve me figura publike gjatë një eventi të organizuar nga Ambasada e Shqipërisë në Kosovë.
Presidentja thekson se pjesëmarrja në aktivitete publike nuk mund të interpretohet si një “shoqërim” dhe i cilëson këto akuza si shpifje.
Mes tjerash, presidentja i bën thirrje sërish organeve të rendit dhe drejtësisë që të veprojnë në përputhje me ligjin, që vrasësi të marrë dënimin e merituar.