Gjykata Supreme e Kosovës ka hedhur poshtë si të palejuar ankesën administrative të Sami Kurteshit dhe Alban Krasniqit, anëtarë të Komisionit Qendror të Zgjedhjeve (KQZ) nga radhët e Lëvizjes Vetëvendosje, kundër vendimit të Panelit Zgjedhor për Ankesa dhe Parashtresa (PZAP).
Në aktvendim, Gjykata thekson se Kurteshi dhe Krasniqi nuk kanë legjitimitet për të paraqitur ankesë në emër të tyre, pasi nuk janë palë të drejtpërdrejta sipas vendimit të PZAP-it.
Ky i fundit kishte marrë vendim më 23 gusht 2025, duke aprovuar ankesën e Listës Serbe kundër vendimit të KQZ-së që kishte refuzuar certifikimin e kandidatëve të saj për zgjedhjet lokale të 12 tetorit 2025.
“Hedhet poshtë si e palejuar ankesa e parashtruar nga Sami Kurteshi dhe Alban Krasniqi, me vendbanim në Prishtinë, të dy anëtar të Komisionit Qendror të Zgjedhjeve (KQZ), e paraqitur kundër vendimit të Panelit Zgjedhor për Ankesa dhe Parashtresa (PZAP) A.nr.3/2025, të datës 23.08.2025”, thuhet në vendim e Supremes.
“Si rrjedhojë, kolegji i Gjykatës Supreme duke u nisur nga fakti se ankesa ndaj vendimit të
PZAP-it në Gjykatën Supreme është parashtruar nga Sami Kurteshi dhe Alban Krasniqi në cilësinë e anëtarit individual të KQZ-së, të njëjtit nuk kanë të drejtë, përkatësisht nuk kanë legjitimitet që të parashtrojnë ankesë në emër të tyre personalisht, pasi që nuk janë palë të drejtpërdrejta sipas vendimit të PZAP-së. Kjo për faktin se sipas vlerësimit të kolegjit të kësaj gjykate të drejtë për të paraqitur ankesë në Gjykatën Supreme ndaj vendimit të PZAP-it, përveç personave që kanë interes ligjor (të përcaktuar me paragrafin 1 të nenit 119), ka vetëm KQZ-ja, përkatësisht zyra e saj, ashtu siç është e përcaktuar me Ligjin për Zgjedhjet e Përgjithshme, përkatësisht nenin 119 paragrafi 2, e jo anëtarët individual të saj. Për më tepër, këta të fundit e shprehin mendimin e tyre gjatë procesit të vendimarrjes brenda KQZ-së, por nuk legjitimohen që të veprojnë si palë individuale në procedurë gjyqësore, siç është edhe rasti konkret”, thuhet më tej në vendimin e Supremes.
Vendimi i KQZ-së ishte bazuar në vlerësimin se disa kandidatë nuk i plotësonin kriteret ligjore për të qenë pjesë e garës.
Megjithatë, PZAP e kishte cilësuar këtë refuzim si të pambështetur në mënyrë të duhur në ligj, duke rikthyer në garë Listën Serbe. Përpjekja e dy anëtarëve të KQZ-së për ta kontestuar këtë vendim në Gjykatën Supreme nuk ka pasur sukses, pasi ankesa u konsiderua e palejuar.