Policia e Kosovës ka raportuar pesë raste të ndara që lidhen me armë zjarri, posedim të paautorizuar të armëve dhe substanca narkotike, të regjistruara gjatë 24 orëve të fundit në disa qytete të vendit.
Në Podujevë (fsh. Kërpimeh), me urdhër të prokurorit është bastisur shtëpia e një të dyshuari ku u gjet dhe u konfiskua një pushkë gjysmë automatike si dhe 56 fishekë të kalibrit 7.62 mm. Nuk është raportuar për arrestime.
Në Prishtinë, janë shënuar tri raste:
-
Në rrugën Murat Mehmeti, pas të shtënave me armë zjarri nga një veturë në lëvizje, policia gjeti dhe konfiskoi katër gëzhoja. Rasti është në hetime.
-
Në një rast tjetër, një burrë u arrestua pasi shtiu me armë zjarri. Policia i konfiskoi armën, një karikator me 16 fishekë dhe një sasi të vogël narkotikësh. Me vendim të prokurorit ai u dërgua në mbajtje.
-
Po ashtu, në lidhje me një rast të mëparshëm rrëmbimi të ndodhur më 29 korrik, më 17 shtator u arrestua një person dhe u dërgua në mbajtje me vendim të prokurorit.
Në Shtime (fsh. Mullopolc), një veturë që nuk iu bind policisë u braktis në një zonë malore. Brenda saj u gjet një pistoletë me pesë fishekë dhe një sasi marihuane. Rasti është nën hetim.
Ndërkaq, në Leposaviq, pas një mosmarrëveshjeje nën ndikim të alkoolit, një person u arrestua pasi kanosi viktimën. Në bastisjen e shtëpisë së tij u gjetën një pushkë gjuetie, 46 fishekë të kalibrit të ndryshëm, 90 patrona gjuetie dhe një maskë gazi. Me vendim të prokurorit, i dyshuari u lirua në procedurë të rregullt.
Policia bën të ditur se të gjitha rastet janë duke u trajtuar sipas procedurave ligjore dhe nën mbikëqyrjen e prokurorëve kompetentë.