Drejtori i Përgjithshëm i Policisë së Kosovës, kolonel Gazmend Hoxha, ka pritur sot në takim ministren e Drejtësisë të Belgjikës, Annelies Verlinden, dhe Ministren e Migrimit dhe Azilit, Anneleen Van Bossuyt, të shoqëruara nga bashkëpunëtorë të tyre.
Gjatë takimit, drejtori Hoxha i ka njoftuar për strukturën organizative të Policisë së Kosovës, rezultatet e arritura në luftimin e krimit dhe ruajtjen e sigurisë publike, si dhe sfidat me të cilat është përballur institucioni ndër vite.
Në fokus të diskutimit ka qenë bashkëpunimi ndërkombëtar policor dhe mundësia e nënshkrimit të një Marrëveshjeje Mirëkuptimi ndërmjet dy policive, që do të përfshinte fushat e luftimit të krimit të organizuar, kontrabandës, trafikimit të qenieve njerëzore, migrimit të paligjshëm dhe krimeve kibernetike.
Takimi është përmbyllur me zotimin e të dyja palëve për thellim dhe avancim të bashkëpunimit të ndërsjellë në fushën e sigurisë.
Osmani me dy ministret e Belgjikës diskuton për bashkëpunimin në drejtësi dhe siguri