Kuvendi i Kosovës ka dështuar të zgjedh Qeverinë e re pasi që në seancën e jashtëzakonshme të kësaj të diele ku e vetmja pikë e rendit të ditës ishte krijimi i qeverisë, “Kurti 3” mori vetëm 56 vota për, 52 deputetë votuan kundër dhe katër të tjerë abstenuan.
Kreu i Kuvendi të Kosovës, Dimal Basha, në mbyllje se seancës u shpreh se tani përgjegjësia kalon te presidentja Vjosa Osmani, njofton Dukagjini.
Kushtetuta e Kosovës përcakton që nëse përbërja e propozuar e Qeverisë së re nuk e merr shumicën e nevojshme të deputetëve, presidentja e Kosovës duhet të emërojë një mandatar të dytë për kryeministër brenda dhjetë ditësh, i cili i ka gjasat më të mira për të formuar Qeverinë.
Megjithatë, Presidentja Vjosa Osmani do të ftojë partitë politike për konsultime brenda afatit kushtetues dhe në përputhje me përgjegjësitë kushtetuese.
Këtë për Dukagjinin e tha këshilltari për media i presidentes, Bekim Kupina.
“Presidentja Osmani do t’i ftoj partitë politike për konsultime gjithsesi brenda afatit kushtetues dhe në përputhje me përgjegjësitë kushtetuese”, deklaroi Kupina.
Por, kujtojmë se krerët e partive opozitare PDK, LDK, AAK dhe NISMA si në seancë edhe në deklarimet pas përfundimit të saj deklaruan se nuk do ta bëjnë shumicën dhe se vendi duhet të bëhet gati për zgjedhje.
Sipas Kushtetutës, zgjedhjet duhet të mbahen brenda 40 ditëve nga data e thirrjes.