Sot do të zhvillohet seanca gjyqësore ndaj ministrit në detyrë të Punëve të Brendshme, Xhelal Sveçla, dhe deputetëve të Vetëvendosjes, Salih Zyba dhe Fitore Pacolli-Dalipi, të cilët akuzohen për hedhjen e gazit lotsjellës në Kuvendin e Kosovës në mars të vitit 2018.
Ata po gjykohen gjithashtu bashkë me Drita Millakun për veprat penale “përdorimi i armës apo mjetit të rrezikshëm” dhe “pengimi i personit zyrtar në kryerjen e detyrës zyrtare”.
Urdhëresa e Gjykatës: Sveçla, Zyba e Pacolli të sillen me detyrim në seancën gjyqësore
Vlen të ceket që para dy ditësh, Gjykata Themelore në Prishtinë ka njoftuar se ka lëshuar urdhër për sjellje me detyrim ndaj Sveçlës, Zybës dhe Pacolli-Dalipit, pasi ata munguan pa arsye në seancën e 16 shtatorit.
Policia e Kosovës është urdhëruar të ekzekutojë këtë urdhër dhe të sigurojë praninë e të pandehurve në seancën e sotme.
“Ju njoftojmë se në Gjykatën Themelore në Prishtinë – Departamenti i Përgjithshëm Penal, është duke u zhvilluar procedura penale kundër të pandehurve, D.M., XH.S., S.Z., dhe F.P.D, për shkak që secili veç e veç kanë kryer veprën penale Përdorimi i armës apo mjetit të rrezikshëm, nga neni 375 paragrafi 1 dhe veprës penale Pengimi i personit zyrtar në kryerjen e detyres zyrtare nga neni 409 paragrafi të KPRK-së.
Gjyqtari i kësaj çështje penale, për shkak se të pandehurit F.P.D, S.Z., dhe XH.S kishin munguar në seancën e datës 16.09.2025 dhe mungesën e tyre nuk e kishin arsyetuar, ka vendosur jashtë seancës dhe ka lëshuar Urdhëresë për sjellje me detyrim kundër të pandehurve F.P.D, S.Z., dhe XH.S.
Gjykata ka ndërmarr të gjitha veprimet e duhura dhe ka urdhëruar Policinë e Kosovës që të ndërmarr veprimet e mëtejme procedurale për të siguruar prezencën e të pandehurve në seancën e radhës. Urdhëresën do ta ekzekutoj Policia e Kosovës”, thuhej në njoftimin e Gjykatës për Dukagjinin.