Presidenti i Turqisë, Rexhep Tayip Erdogan, ka deklaruar se teksa grupi palestinez Hamas po vepron me kujdes në përmbushjen e marrëveshjes së armëpushimit, Izraeli po kërkon justifikime për të shkelur marrëveshjen dhe për të rifilluar masakrat e tij.
“Të gjithë e dinë rekordin e tmerrshëm të Izraelit kur bëhet fjalë për mbajtjen e premtimeve të tij”, tha Erdogan në Forumin Botëror të TRT-së në Stamboll.
Erdogan theksoi se në Gaza pothuajse asnjë ndërtesë e vetme nuk ka mbetur pa u prekur, duke shtuar se shkollat, kishat, xhamitë dhe spitalet u bombarduan, shkruan Anadolu, transmeton Dukagjini.
Presidenti turk tha se Izraeli ka armë bërthamore dhe aftësinë për të goditur Gazën “kur dhe si të dojë”, teksa tha se s’mund të jetë i pafajshëm.
Erdogan theksoi se Izraeli tani po përdor urinë si armë vdekjeprurëse në Gaza, veçanërisht kundër fëmijëve.
“Kundër makinerisë propagandistike të Izraelit, të ndërtuar mbi gënjeshtra, u vranë 270 gazetarë që ekspozuan propagandën e rreme të Tel Avivit, duke treguar të vërtetën në terren”, shtoi presidenti Erdogan.
Ai kritikoi institucionet që janë përgjegjëse për mbrojtjen e paqes dhe stabilitetin global për dështimin në ndalimin e masakrave, parandalimin e gjenocidit dhe shpëtimin e jetës së fëmijëve.