Komisioni Shtetëror i Zgjedhjeve në Maqedoninë e Veriut ka njoftuar se deri në orën 15:00, të drejtën e votës në balotazhin e zgjedhjeve lokale e kanë shfrytëzuar 27.19% e qytetarëve, ose 275 mijë e 34 votues.
Sipas të dhënave të KSHZ-së, dalja më e madhe e votuesve është regjistruar në komunat Bërvenicë dhe Kërçovë, ku garojnë kandidatë shqiptarë dhe maqedonas në një garë të ngushtë.
Në Bërvenicë, deri në orën 15:00 kanë votuar 40.83% e qytetarëve, ndërsa në Kërçovë 40.06%.
Ndërkohë, dalja më e ulët është shënuar në komunën e Bogovinës me 26.49% dhe në Dibër me 26.72%.
Në krahasim me rundin e parë të zgjedhjeve, dalja deri në orën 15:00 ishte 31.16%, pra rreth 4 për qind më e lartë se në këtë balotazh.