Kandidati i PDK-së për kryetar të Mitrovicës, Arian Tahiri, ka njoftuar se Aleanca për Ardhmërinë e Kosovës (AAK) i është bashkuar koalicionit të tij për balotazhin e 9 nëntorit.
Përmes një postimi në Facebook, Tahiri ka falënderuar kryetarin e degës së AAK-së në Mitrovicë, Qazim Nimani, dhe strukturat e partisë për mbështetjen dhe bashkëpunimin në këtë garë.
“Sot, zyrtarisht edhe AAK-ja i është bashkuar rrugëtimit dhe vizionit tonë për Mitrovicën. Faleminderit kryetarit z. Qazim Nimani dhe strukturave të AAK-së për besimin dhe mbështetjen! Mitrovicën e kemi shtëpi dhe së bashku do ta ndërtojmë kapitullin e ri të bashkëpunimit, punës dhe shpresës,” ka shkruar Tahiri.
Ai ka theksuar se balotazhi i 9 nëntorit do të jetë ditë bashkimi për qytetarët, duke vendosur interesin e Mitrovicës mbi ndarjet politike.