Emri i Sreqko Spasiqit të dielën do të figurojë në fletëvotime ndonëse i njëjti nuk është më në garë për të marr udhëheqjen e komunës së Kllokotit.
Spasiq i iniciativës “Uniteti Kombëtar Serb” që kaloi raundin e parë të zgjedhjeve për tu ballafaquar në balotazh me Listën Serbe, njoftoi se ka vendosur të tërhiqet nga gara e të kaloj pikërisht në partinë prej të cilës ishte kundërkandidati i tij.
Dukagjini ka provuar të marr një qëndrim nga kandidati që i është bashkuar se fundmi Listës Serbe, por i njëjti ka qenë i paqasshëm gjatë ditës.
Këto veprime të momenteve të fundit, i vlerëson si ndërhyrje nga Serbia, Arber Emini i cili ishte në garë për kryetar te komunës së Kllokotit.
“Kjo është ndikim direkt i Serbisë dhe Milan Radoiciqit, Srecko Spasici është i ndikuar prej tyre edhe ka dal prej tyre. Është një koordinim i strukturave ilegale të Serbisë është angazhimi i Milos Strenkoviqit, janë videot, dëshmitë që ka bërë thirrje me u mbështet Lista serbe dhe SNS-ja në komunën e Kllokotit. Ka qenë një organizim për ndërhyrje edhe i zyrës për Kosovë”, ka thënë Emini.
Ai thotë se KQZ-ja duhet të ndërmarr veprime për Spasiqin.
“Nuk është demokraci, nuk është balotazh me një kandidat. Unë kamë kërkuar nga KQZ-ja decertifikimin e kandidatit për kryetar të komunës Srecko Spasic, se nuk përfaqëson interesat e qytetarëve dhe votën e lirë demokratike, besoj që KQZ-ja duhet me reflektu”, ka shtuar Emini.
Por, tërheqja e Spasiqit nuk do te ndikojë në organizimin e raundit të dytë të zgjedhjeve, sepse KQZ-ja i konfirmoi Dukagjinit se afati për këtë ishte 2 shtatori.
“Tërheqja e një kandidati nga procesi zgjedhor në këtë fazë, nuk ndikon në mbajtjen e garës zgjedhore. Sipas procedurave dhe afateve të vendosura nga KQZ, afati i fundit për tërheqjen e kandidatëve nga gara zgjedhore ishte data 2 shtator 2025. Rrethi i dytë i zgjedhjeve për kryetar të komunës së Kllokotit vazhdon me emrat e 2 kadidatëve që kanë fituar më së shumti vota në raundin e parë.”
Spasiq, në të kaluarën ka qenë kryetar i komunës së Kllokotit nga radhët e Listës Serbe, por ishte larguar nga kjo parti më 2017.
Sipas rezultateve, të KQZ-së në rundin e parë në Kllokot, Bozhidar Dejanoviq fitoi 893 vota apo 41.38 për qind të votave, ndërkaq Sreqko Spasiq 674 vota apo 31.23 për qind.