Kandidati i Lëvizjes Vetëvendosje për kryetar të Prishtinës, Hajrulla Çeku, në Debat Plus ka deklaruar se në katër vitet e ardhshme kryeqyteti do të ketë investime që kapin vlerën mbi 1.5 miliardë euro.
Ai theksoi se nëse fiton mandatin, buxheti total i Komunës për katër vitet e ardhshme arrin në 650 milionë euro, ndërsa 170 milionë euro janë financime të ndërmarrjeve komunale si Termokos, Trafiku Urban e Pastrimi.
“Qysh e shohë unë Prishtinën edhe qysh do të jetë në katër vitet e ardhshme. Do të jetë një Prishtinë ku do të investohen të paktën 1.5 miliardë euro në mandatin e ardhshëm. Fillimisht buxheti i komunës për 4 vitet e ardhshme në total shkon në 650 milionë euro, janë të komunës. Financimet që janë në pritje të një komune që është e përgjegjshme dhe që i menaxhon si duhet ndërmarrjet komunale i kemi rreth 170 milionë euro, i përmenda Termokosi, Trafiku Urban, Pastrimi e të tjerë”, ka deklaruar ai
Sipas tij, nga instrumentet financiare ndërkombëtare pritet të sigurohen mbi 450 milionë euro, ku përfshihet blerja e autobusëve të rinj për Trafikun Urban, 30 deri në 50 milionë euro për izolimin termik të ndërtesave, si dhe 22 milionë euro për zgjerimin e rrjetit të Termokosit.
Çeku përmendi edhe 70 milionë euro për rinovimin dhe ndërtimin e Kampusit të Konvikteve për Lojërat Mesdhetare, si dhe mbështetjen qeveritare për Unazën e Jashtme, ndërtimin e Teatrit të Operës, muzeun e artit bashkëkohor dhe izolimin e ndërtesave publike e private.
“Financimet e mundshme dhe në proces nga instrumentet financiare ndërkombëtare janë në vlerën mbi 450 milionë euro, këtu përfshihen trafiku urban blerjet e tjera të autobusëve. 30 deri në 50 milionë euro rinovim dhe izolim termik i ndërtesave, 22 milionë euro shtesë për zgjerim të rrjetit të Termokosit. Rinovimi dhe ndërtimi i Kampusit të Konvikteve për Lojërat Mesdhetare 70 milionë euro, qendra e studentëve.
Janë edhe 240 milionë euro trajtimi i ujërave të zeza. Kësaj ia shtojmë edhe financimin nga Qeveria, unaza e jashtme, rinovimi dhe izolimi i ndërtesave publike edhe private si projekt me mbështetje nacionale. Tetarin i Operës fillon të ndërtohet, Prishtina bëhet me tetarin e ri të qytetit, me Muzeun e Artit bashkëkohor, janë të paktën 1.5 miliardë me synimin që me i çu në 2 miliardë euro investime përmes cilave me qasje bashkëpunuese ne i japim zhvillim dhe transformim një Prishtine”, ka deklaruar tutje Çeku.