Ish-komandanti suprem i NATO-s, gjenerali Wesley Clark, ka nisur dëshminë e tij para trupit gjykues në Hagë, ku po paraqitet si dëshmitari i fundit i thirrur nga mbrojtja e ish-presidentit të Kosovës, Hashim Thaçi.
Në seancë, Clark ka rikthyer kujtimet nga periudha e fillimit të konfliktit në Kosovë, duke treguar për momentet kur raportimet e para për masakrën ndaj familjes Jashari kishin tronditur udhëheqjen ndërkombëtare.
Sipas Clark, gjithçka kishte ndodhur në fillim të marsit, kur ai ndodhej në Maqedoni për të inspektuar një Task-Forcë amerikane të vendosur në kufirin me Serbinë.
“Unë shkova në Maqedoni, më duket se kanë qenë ditët e para të marsit, kishim një Task-Forcë të forcave amerikane në Maqedoni, që ishte vendosur para disa viteve për të qëndruar në kufirin mes Serbisë dhe Maqedonisë. Unë nuk kam qenë asnjëherë atje, shkova ta inspektoja. Menjëherë më merr në telefon ambasadori amerikan në Shkup, Chris Hill, dhe më thotë se duhej të flisja me presidentit e Maqedonisë. Kisha dëgjuar raporte se ishte vrarë familja Jasharajve, kishte shqetësime për këtë gjë. Por kur shkova ta takoja presidentin Glikorov, ai ma shpjegoi se tani do të fillojë një konflikt për shkak të kësaj, kjo vrasje do të nxisë një konflikt”, ka thënë Clark.