Një 28-vjeçar është plagosur të mërkurën në rrugën “Ismail Kryeziu” në Prizren.
Viktima është plagosur në të dyja këmbët teksa rasti ka ndodhur gjersa ishte duke vozitur me automjet teksa i dyshuari ka ikur nga vendi i ngjarjes me një trotinet elektrik, njofton Dukagjini.
Rastin për Dukagjinin e ka konfirmuar drejtori rajonal i Policisë në Prizren, Faton Alija.
“Më datë 19.11.2025, rreth orës 23:15, në rrugën “Ismail Kryeziu” në Prizren, patrulla policore gjatë patrullimit ka dëgjuar krisma armësh dhe ka hasur një person të plagosur nga arma e zjarrit. Viktima, Gj. Sh., mashkull 28 vjeçar nga Prizreni, ka pësuar plagosje në të dy këmbët dhe ndodhet jashtë rrezikut për jetë. Sipas informacioneve të para, dyshohet se Viktima ishte në lëvizje me automjet kur një person ka shtënë me armë në drejtim të tij dhe më pas është larguar nga vendi i ngjarjes me një trotinet elektrik. Viktima është dërguar në Spitalin Rajonal të Prizrenit për trajtim mjekësor”, u shpreh Alija.
Tutje, ai bën të ditur se në konsultim me prokurorin, është filluar rasti “Vrasje në tentativë” dhe hetimet po zhvillohen nga Sektori Rajonal i Hetimeve i DRP Prizren.
“Policia ka mbledhur prova nga vendi i ngjarjes, ka intervistuar viktimën dhe dëshmitarët, dhe po punon në identifikimin dhe arrestimin e të dyshuarit”.