Pas vendimit të Këshillit Prokurorial të Kosovës për shkarkimin e ushtruesit të detyrës së Kryeprokurorit të Shtetit, Besim Kelmendi, pesë anëtarë të KPK-së dolën në një konferencë për media për të kundërshtuar vendimin.
Ata thanë se propozimi për shkarkimin e Kelmendit ishte kundërshtuar nga disa anëtarë të Këshillit, të cilët edhe u larguan nga mbledhja në shenjë mospajtimi.
Visar Krasniqi e quajti vendimin “të jashtëligjshëm”, duke argumentuar se nuk mund të merren vendime pa njoftim të anëtarëve dhe pa respektuar procedurat ligjore.
Sipas deklaratës së anëtarëve, vendimi i sotëm për shkarkimin e Kelmendit është një tentativë për të imponuar pushtet institucional në mënyrë të jashtëligjshme.
Ndërsa ushtruesi i detyrës Besim Kelmendi tha se pas këtij organizimi qëndron Blerim Isufaj, kryeprokuror i Prokurorisë Speciale.
Ata ftojnë Policinë e Kosovës që të kujdeset për sigurinë e tyre dhe mediat të monitorojnë zhvillimet.
Sipas tyre, Besim Kelmendi vazhdon të ushtrojë detyrën, duke u bazuar në faktin se vendimi i sotëm nuk ka efekt juridik dhe është i papranueshëm.
Në mbledhjen e Këshillit Prokurorial të Kosovës për shkarkimin e ushtruesit të detyrës së Kryeprokurorit të Shtetit, pesë anëtarë votuan pro: Ardijan Hajdaraj, Jehona Grantolli, Jetish Maloku, Arjana Shajkovci dhe Milot Krasniqi.
Nga ana tjetër, anëtarët Arian Gashi, Visar Krasniqi, Besim Kelmendi dhe Dardan Vuniqi e lëshuan mbledhjen, duke mos marrë pjesë në votim dhe duke shprehur kundërshtimin e tyre ndaj procedurës./Dukagjini
Shkarkohet ushtruesi i detyrës së Kryeprokurorit të Shtetit, Besim Kelmendi