Një tërmet i fuqishëm goditi të premten kryeqytetin e Bangladeshit, Daka, duke vrarë të paktën nëntë persona dhe duke plagosur më shumë se 300 të tjerë.
Tërmeti me magnitudë 5.5 ballë ndodhi në orën 10:38 të mëngjesit pranë qytetit Narsingdi, rreth 33 kilometra nga Daka, sipas Shërbimit Gjeologjik të SHBA-së, shkruan AFP, transmeton Dukagjini.
Zyra e shtypit e qeverisë së përkohshme atje, tha se të paktën nëntë persona u vranë dhe më shumë se 300 të tjerë u plagosën. Të paktën 14 ndërtesa u dëmtuan dhe një zjarr shpërtheu në një termocentral, por më vonë u vu nën kontroll.
Udhëheqësi i përkohshëm Muhammad Yunus, tha se qeveria po merrte të gjitha masat e nevojshme.
Nëntë persona u dërguan në spitalet në Daka me lëndime të rënda, sipas departamentit të shëndetësisë të qeverisë.
Dridhja zgjati për 26 sekonda, sipas Departamentit Meteorologjik të Bangladeshit, i cili regjistroi magnitudë 5.7.