Gjykatësi i Qarkut të SHBA-së, Michael Nachmanoff, ka rrëzuar aktakuzën penale ndaj ish-drejtorit të FBI-së, James Comey, duke e cilësuar atë të pavlefshme për shkak të gabimeve procedurale.
Ky vendim përbën një goditje të rëndë për Departamentin e Drejtësisë, në një çështje të cilën shumë e kanë parë si pjesë të një fushate politike kundër kritikëve të presidentit amerikan, Donald Trump.
Vendimi i gjykatës përfshin edhe një kritikë të drejtpërdrejtë ndaj Lindsay Halligan, aleate e ngushtë e Trump dhe avokate e tij e mëparshme personale, e cila kishte marrë përsipër çështjen si prokurore e përkohshme në Distriktin Lindor të Virxhinias, megjithëse pa asnjë përvojë paraprake si prokurore.
Halligan u paraqit e vetme edhe në Gjykatën Supreme, pasi asnjë prokuror karriere nuk pranoi të përfshihej në këtë rast.
Comey është një nga tre kritikët e njohur të Trump-it që janë paditur nga Departamenti i Drejtësisë muajt e fundit. Ai ishte shkarkuar si drejtor i FBI-së në vitin 2017, në kohën kur FBI-ja hetonte ndërhyrjen e mundshme ruse në zgjedhjet presidenciale të vitit 2016.
Aktakuza kundër tij, e ngritur në shtator, e akuzonte për pengim të drejtësisë dhe dhënie të deklaratave të rreme — akuza që Trump i kishte kërkuar publikisht për vite me radhë. Comey është ish-drejtori i parë në historinë e FBI-së që përballet me akuza penale, dhe ndonëse aktakuza tashmë është rrëzuar, nëse ai do të ishte shpallur fajtor, rrezikonte deri në pesë vjet burg.