Kryeministri në detyrë i Kosovës, Albin Kurti, ka shprehur ngushëllime të thella për familjen Kasapi pas lajmit të hidhur për vdekjen e këngëtarit të njohur, Shpat Kasapi. Në telegramin e tij, Kurti e ka cilësuar humbjen e artistit si të rëndë, të papritur dhe tejet të padrejtë.
Kurti theksoi se Shpati, me këngët dhe praninë e tij karizmatike, ka qenë pjesë e pandashme e rritjes së shumë brezave të pasluftës dhe ka mbajtur një vend të veçantë në zemrat e shqiptarëve kudo në botë.
“E nderuar familja Kasapi,
Me zemër të rënduar pranova lajmin për ndarjen nga jeta të Shpatit. Një ikje e tillë, e papritur dhe e parakohshme, dhemb shumë dhe vjen si e padrejtë. Tingëllon edhe e pavërtetë, aq i ri ishte dhe gjithë atë energji e mbante dhe e rrezatonte.
Humbja e tij na ka prekur të gjithëve, pa marrë parasysh profesionet apo gjeneratat. Shumë breza të pasluftës janë rritur me figurën e tij dhe këngët emblematike. Ai ka mbajtur një vend të veçantë në zemrat e të gjithëve si një djalë punëtor, i qeshur, dhe mbi të gjitha, shumë karizmatik. Komuniteti artistik ka humbur njërin nga figurat më të dashura të tij, sepse secili prej tyre ka vetëm fjalë të mira për Shpatin. Muzika e tij ka arritur të bashkojë shqiptarë gjithandej botës, por më së shumti ka bashkuar shqiptarët e Kosovës e të Luginës, Maqedonisë së Veriut dhe Shqipërisë. Ky kontribut i tij do të mbetet përherë i pashlyeshëm.
Ngushëllime gjithë familjes Kasapi, komunitetit artistik, miqve dhe bashkëpunëtorëve të tij. Ngushëllime zonjës Gjylymser, zonjës Selvije dhe djalit Roel. Zoti u dhashtë forcën për të përballuar këtë humbje.
Me respekt të thellë,
Albin Kurti
Kryeministër i Republikës së Kosovës”, thuhet në telegram e Kurtit.